O cambio climático...

 

Mércores, estamos case no ecuador da semana. Hoxe preséntovos a sección "Gaia", nela os mércores subirei contido relacionado cas ciencias naturais.

Para esta primeira entrada o tema elixido é o cambio climático, unha realidade ca que este verán comezamos a convivir.

➤ Definición.

O cambio climático é, segundo a definición de Nacións Unidas, todos aqueles cambios a longo prazo das temperaturas e dos patróns climáticos. 

Estes cambios poden ser naturais, pero dende o século XIX, as actividades humanas son a principal causa do cambio climático, sobre todo debido á queima de combustibles fósiles como o carbón, o gas e o petróleo. Esta queima xera emisións de gases efecto invernadoiro que actúan como unha manta quente que cubre a Terra, mantén a calor do sol e facendo que a temperatura aumente.

➤ Efectos no Medio Ambiente.

Os efectos do cambio climático no medio ambiente son:

- Aumento da temperatura:

Este aumento foi incrementándose notablemente nas derradeiras décadas, cunha taxa de aumento de 0,5ºC por década. As previsións para o 2100 din que a temperatura podería chegar a alcanzar 6ºC por riba do normal, o cal traerá consecuencias negativas nos ecosistemas, o aumento de ondas de calor ou, como veremos a continuación, o aumento dos incendios e do desxeo.

- Desxeo:

Co aumento da temperatura, chega o desxeo. Esta perda é unha das consecuencias máis preocupantes e visíbles do cambio climático xa que incide sobre o nivel do mar, facendo que aumente e tamén sobre a dinámica oceánica. Os científicos calculan que os 220.000 glaciares de montaña do mundo están a perder máis de 328.000 millóns de toneladas de xeo e neve ao ano dende o 2015.

- Aumento do nivel do mar:

Ligado ó desxeo, como vimos anteriormente, pero tamén polo aumento da temperatura. O aumento do nivel do mar fará que moitas zonas costeiras desaparezan por completo e moitas outras inda que non cheguen a desaparecer, sufran inundacións graves.

- Desertización:

A desertización é un proceso erosivo que converte unha terra fértil e habitable nun deserto. Esta consecuencia do cambio climático será especialmente dañina na península Ibérica, se segue aumentando a temperatura media do planeta, no ano 2090 será como o Sahara, segundo a revista Science.

- Incendios:

De actualidade este tema dende fai semanas no noso país, xa que son moitas as comunidades autónomas que están vendo como o lume arrasa territorios, montes e incluso aldeas. O cambio climático transformará o réxime de incendios nos próximos anos, provocando fenómenos máis intensos e unha deforestación maior pola diminución da capacidade de recuperación dos bosques mediterráneos.

O aumento da temperatura media e a diminución das precipitacións crearán o caldo de cultivo ideal para os incendios, especialmente nas zonas de alta montaña. Ademais, cada vez superan con maior frecuencia as 500 hectáreas (os denominados ‘Grandes Incendios Forestais‘) e son máis virulentos e difíciles de combater.

- Fenómenos metereolóxicos extremos:

O cambio climático cas consecuencias anteriormente mencionadas, farán que sexan máis frecuentes o calor extremo (este verán estamos xa experimentando isto), as choivas torrenciais e aumente a probabilidade de secas. 

- Impacto na biodiversidade:

O cambio climático está a afectar a procesos esenciais de moitos organismos, como o crecemento, a reprodución e a supervivencia das primeiras fases vitais, podendo chegar a comprometer a viabilidade dalgunhas poboacións. Algúns ecosistemas están abocados á desaparición, mentres tamén se dará unha maior proliferación de especies invasoras que buscan a supervivencia.