Coñecendo a...Ana de Castro.

Bo día! Estamos de estreo no blog: hoxe inauguramos a sección ¨coñecendo a¨. Nela, cada venres, faremos unha viaxe pola historia e cultura galega, coñecendo a personaxes importantes que forman parte dela.

Nesta primeira entrada, teño que confesar que houbo un pequeno cambio. Tiña pensado face-lo post sobre Rosalía de Castro pero levo un par de semanas investigando un pouco sobre a Inquisición e a súa repercusión na zona do Salnés, por iso decidín cambiar o personaxe.

Hoxe, coñeceremos a Ana de Castro, veciña de Meis (Pontevedra), procesada polo Santo Oficio baixo a acusación de bruxería.

A Inquisición foi unha institución fundada, en España, no ano 1478 polos Reis Católicos, co fin de manter o catolicismo nos seus reinos (recordemos que ata o ano 1479 non culmina a unión dinástica dos dous reinos). De esta forma, perseguiuse e castigouse todo aquel culto e rito que non fora católico, e ademais, houbo acusados de bruxería, homosexualidade e blasfemia, non só de herexía.

A primeira referencia ó Tribunal da Inquisición de Galicia data do ano 1520, cando foi nomeado inquisidor o licenciado Maldonado e meses despois o mestre Arteaga. Ambos inquisidores exerceron de forma non continuada, o que provocou que no ano 1532, o Tribunal de Galicia, pasase a depender do Tribunal de Castilla La Vieja e o reino de León.

A historia da Inquisición en Galicia foise escribindo nos seguintes anos, nos que se estableceu en Santiago unha nova sede do Santo Oficio e é no ano 1626, que a nosa protagonista, Ana de Castro, sen sabelo, convértese en parte de esa historia. 

Sede do Santo Oficio da Inquisición en Santiago de Compostela.

Ana era veciña da Armenteria, Meis. Xoven e solteira, dedicábase á menciña popular, axudaba á xente con plantas e oracións, tal como ela mesmo confesou. 

"Jesucristo fue bautizado en el río Jordán, San Pedro y San Juan lo tuvieron pola man; ansi destos males se jafan pola gracia de Deus e de la Virgen María, Pater nostrer y Ave María", oración coa que curaba ós seus pacientes.

O 1 xulio do ano 1626 comeza o seu primeiro xuízo, no que 26 testemuñas declaran na súa contra, asegurando que Ana tiña tratos con Demo e usaba rituais de adiviñanza. Un dos testemuños repetiu a oración coa a que curaba ós seus pacientes e Ana inculpouse recoñecendo ter curando a algunhas persoas invocando a Xesucrito. Foi a única declaración que fixo Ana, quen foi duramente torturada durante meses.

O 14 de outubro de 1626, o Tribunal da Santa Inquisición, declara a Ana de Castro "feiticeira, embusteira e adiviñadora". No seu Auto de Fe, obrigárona a saír vestida co hábito de penitente de media aspa, e léronlle a súa sentenza: 200 azotes e o desterro do couto da Armenteira e de Santiago durante 6 anos.

O 6 de decembro de ese mesmo ano, execútase a sentenza  nunha misa no convento de San Paio de Ante-altares. Ó lombo dun burro, medio espida, foi azoutada, vexada e insultada polas rúas de Santiago.

Hábito do penitente ou Sambenito, co que mostraban o seu arrepentimiento público polos seus pecados.

Ana marcha ó exilio e sita a súa morada en Pontevedra, onde coñece a Benito Graña, con quen casa e forma unha bonita familia. 

Cando a vida de Ana parece que comeza a coller bo rumbo, o episcopado pontevedrés decide entregala como regalo a Juan Rojo, cruel inquisidor que estaba de visita e quen decide reabrir o seu caso.

É así como no ano 1651, Ana volve ó cárcere do Tribunal do Santo Oficio, todos os seus bens quedan expropiados, é novamente castigada a recibir 200 azotes e a exiliarse de Galicia durante 10 anos.

Galicia perde aquí a pista de Ana de Castro, unha muller loitadora, que axudou a quenes a entregaron e fixérona eterna e recordada, por formar parte dun episodio negro da nosa historia.

Ana de Castro, meiga e feiticeira, espero que este pequeno homenaxe conte ca túa aprobación, alá onde estés. A túa historia debe ser coñecida e recordada, por ser obrigada e vivir nunha constante fuxida, só por recoñecer as artes sanatorias da natureza, por querer vivir libre ca túa esencia. 

Espero que vos gustara este novo post. Dádelle moito amor e compartide!!!

Vero💋