Coñecendo a...Benito Soto Aboal.

 Bo día! Hoxe temos unha nova entrega de ¨coñecendo a¨: quero presentarvos a Benido Soto Aboal, sanguinario pirata da vila de Pontevedra.

 O 22 de marzo de 1805, nacía na cidade de Pontevedra o pirata Benito Soto Aboal, sétimo de catorce irmáns, na Casa Pitillo da zona antiga, a carón do Teatro Principal.     

Casa Pitillo, actual Casa das Campás.

                                                              

Pontevedra durante o século XVI fora unha destacada vila mariñeira, tendo o porto máis importante de Galicia e o norte de Portugal pero durante eses anos, comezou un declive que fixo que moita xente tivera que contrabandear nas costas galegas para poder subsistir.                                                        Unido este feito a que Benito criouse no barrio mariñeiro da Moureira e o pai tamén se adicaba ó contrabando marítimo, moi mozo comeza no negocio e pouco a pouco lábrase un nome entre os contrabandistas portuarios.

Benito era moi ambicioso e escapando de "matrícula do mar", coa que debía servir na Mariña Real, créese que fuxiu á Habana e durante uns anos son poucas as fontes historiográficas que falan do noso personaxe. Algunhas afirman que exercía de mariñeiro dedicado á trata de escravos e outras din que combateu con corsarios cubanos.

No ano 1827 embarca no porto de Río de Xaneiro como segundo contramestre nun corsario brasileiro adicado ó tráfico de escravos entre Brasil e África, o "Defensor de Pedro".                                              Cando chegaron á costa africana, deixaron ó capitán Pedro Mariz de Sousa Sarmiento en terra e a tripulación e Benito alzáronse co barco, converténdose Benito en capitán.

O noso personaxe, que máis adiante cambiaría o nome ó navío e bautizouno como "Burla Negra", comeza a adicarse á piratería.

Toma rumbo a a Illa Ascensión e topan ca fragata "Morning Star", de bandeira inglesa, a cal apresan e rouban, matando de forma cruenta a parte dos pasaxeiros. Este feito iniciou a vida de abordaxe que levou a cabo o noso personaxe e comezou a labrar a lenda: Benito, o pirata máis temido do Atlántico.

A súa segunda vítima foi a fragata norteamericana "Topacio" que proviña de Calcuta cun rico cargamento a bordo. A mesma foi abordada, saqueada e incendiada, despois de asasinar a gran parte da súa pasaxe.

En viaxe ás illas Cabo Verde, Benito de Soto abordou un novo navío inglés, ao que tamén afundiu e oito días despois, preto do arquipélago das Canarias asaltou a fragata "Sumbury" da mesma nacionalidade, que viaxaba a Saint Thomas, cribando á súa tripulación.

Poñendo proa novamente aos Azores De Soto abordou de maneira sanguenta un buque portugués procedente de Río de Xaneiro e en viaxe de regreso a España, asaltou o "Cessnock", tamén lusitano e o inglés "New Prospect". As dúas embarcacións, en especial a británica, foron vítimas da terrible crueldade do pirata.

Mapa dos asaltos de Benito Soto.

Tras asasinar a tres dos seus compañeiros, por consideralos pouco leais, chegaron a porto na Coruña e, finxindo ser o lexítimo capitán, venderon a mercadoría que foron roubando nas súas abordaxes. Seguidamente, dirixiuse ás costas de Cádiz, onde planeaban desfacerse do navío para retirarse e vivir das ganancias. Ao divisar o faro da Illa de León, crérono o de Tarifa, e embarrancaron a curta distancia de Cádiz. O Barba Negra afunde e con el o tesouro de anos de pillaxe. Benito sobrevive ó afundimento, así como algún dos seus homes e establécense na cidade de Cádiz, onde a Mariña fixo á vista gorda ó descubrir quen era. Máis un día o seu destino cambia, un mariñeiro inglés sobrevivente ó abordaxe do Morning Star, recoñeceuno paseando pola cidade de Cádiz, sendo finalmente detido xunto a algún dos seus homes. Todos eles foron encarcerados salvo o capitán Benito Soto Aboal que conseguiu escapar de Cádiz e refuxiarse en Xibraltar, onde sería detido pouco despois. Pasou dezanove meses encarcerado no Penedo, mentres os seus antigos compañeiros eran executados expoñéndose as súas cabezas en Cádiz. Xulgado e condenado á forca, culpable de 75 asasinatos e do saqueo de 10 navíos, o 25 de xaneiro de 1830 fronte a Bahía de Alxeciras, morreu o noso pirata, quen antes de ser aforcado, conta a lenda, que gritou: "Adeus a todos, a función rematou!".

Litografía do pirata no Burla Negra.

O 3 de xuño de 1904, varios operarios atopábanse traballando na almadraba situada ao final do barrio de San Xosé ( extramuros de Cádiz). Cavaban unha gabia de medio metro para enterrar as cabezas e os refugallos dos atunes capturados. De súpeto, descobren enterradas unhas moedas das chamadas “Ambos os Mundos” acuñadas en México entre 1750 e 1755, que lembran moito aos duros vixentes con anterioridade. A noticia difúndese e decenas de homes, mulleres e nenos con pas e cribas afánanse pola praia en busca das cobizadas moedas que se venden no acto a prezos entre as tres pesetas e os dezaoito reais.

D. Antonio Perea da Rocha, Marqués de Arellano, investigou exhaustivamente o achado dos duros e todo o que os rodea en arquivos públicos e privados ata que publica un artigo en ABC o 4 de Decembro de 1960 onde condensa todo o atopado. No artigo afirma: “teño case a seguridade absoluta de que as moedas atopadas na praia en 1904 son as que traían a bordo os tripulantes do bergantín brasileiro Defensor de Pedro”.

Os piratas que sobreviviran ó naufraxio, teimosos de que os descubriran en Cádiz, puideron ocultar parte do seu botín na praia gaditana e, tras ser apresados, non volver nunca máis a recuperalas.

Ata aquí o post de hoxe, desexo que fora do voso agrado. Benito Soto, para algúns visto como heroe e para outros como un monstruo, as súas pillerías inspiraron a Canción do Pirata. O pirata máis temido do Atlántico, merece ser coñecido por todos nos.

Compartide!!

Vero💋