A Revolución Francesa...

Hoxe estamos de mércores, un mércores moi luns despois destes días de descanso. No post de hoxe estudaremos a Revolución Francesa, un dos acontecementos máis importantes da nosa Historia xa que supuxo unha ruptura a nivel social, económico e político cunha etapa  da Historia e deu paso a unha nova: a Idade Contemporánea.

Lema da Revolución.

A Revolución Francesa foi un conflito político e social que xurde no 1789, derroca o rei absolutista Luís XVI, instala a república en Francia e finaliza no 1799, co golpe de estado de Napoleón Bonaparte. Para facer máis doado o estudo da Revolución Francesa, farémolo por medio de apartados moi esquemáticos; co máis importantes que debes coñecer.

• Causas.

- Grave crises económicas resultado de malas colleitas consecutivas dende 1760-

- Crises financeira derivada da mala xestión fiscal de Luís XVI. O seu goberno levou á bancarrota a Francia. 

- Crises social, debido ó descontento pola inmobilidade social que freaba as aspiracións da burguesía.

                                                                                                                                                               Unha posible solución a estes problemas era obrigar ós privilexiados a pagar impostos, ó que evidentemente se negaron.

• Convocatoria dos Estados Xerais.

Para intentar calmar as augas, convócanse os Estados Xerais, é dicir, Luís XVI reúnese cos representantes da nobreza, clero e burguesía. Someterían a votación o pago de impostos por parte dos privilexiados e nesta votación, cada estamento conformaría un voto.

Isto supón o descontento do Terceiro Estado, debido a que os privilexiados (Clero e Nobreza) uniríanse e a sairían gañadores da votación. 

O Terceiro Estado pedía o voto por persoa, xa que deste xeito podía obter a maioría, mentres que os grupos privilexiados defendían que o voto continuase igual, por estamento. Evidentemente, o rei e os privilexiados negáronse a aprobar esta proposta e o Terceiro Estado responderon constituíndose en Asemblea Nacional.                               

Estados Xerais reunidos.

• Asamblea Nacional e Toma da Bastilla.

Os membros da Asemblea Nacional reuníronse na sala do Jeu de Paume ou Xogo de Pelota, un espazo utilizado para practicar tenis e alí xuraron que non se disolvería ata a redacción dunha constitución. Mentres, os cidadáns de París, ante o temor e a vontade do rei de suprimir a Asemblea tomaron a Bastilla (14 xullo 1789), edificio da prisión política, símbolo do absolutismo e almacén armamentístico.

Ademais, sementaron o terror nos campos (revolta antiseñorial: queima de conventos, documentos nobiliarios).

A tarefa da Asemblea Constituínte foi histórica. O 4 de agosto de 1789 publicaron os seguintes documentos:

- Abolición dos dereitos feudais.

- Redacción da Declaración dos Dereitos do Home e do Cidadán.

Bastille.

• Etapas da Revolución Francesa.

1. Monarquía Constitucional (1789-1792). 

Ante esta situación, o rei Luís XVI acepta unha nova forma política no goberno de Francia: monarquía parlamentaria e constitucional.                                                                                                             

Nace así a Constitución de 1791 na que se establece:                                                                                 

- A separación de poderes en tres órganos para evitar o abuso de poder: lexislativo, executivo e xudicial.                                                                                                                                                        - Igualdade legal.                                                                                                                                          - Soberanía nacional: a autoridade do poder político reside no pobo a través dos órganos que o representan.                                                                                                                                                  - Dereito do rei para vetar no parlamento.                                                                                                    - Sufraxio indirecto e censatario: a poboación dividiuse entre pasivos e activos.                                        - Separación de Igrexa-Estado.                                                                                                           Créase a Asemblea Lexislativa, encargada de redactar novas leis como por exemplo a prohibición da tortura, a obrigación de pagar impostos a nobreza e a abolición dos gremios. Tamén se crea un novo exército, a Garda Nacional.                                                                                                                           

Aparecen distintos grupos políticos:

Monárquicos:

- Absolutistas: partidarios da concentración de poderes nunha soa persoa, o rei.

- Constitucionais: partidarios da separación de poderes.

Republicanos: 

- Xirondinos: representaban o grupo moderado, pertencían á alta burguesía que defendía a propiedade privada e o liberalismo económico.

- Xacobinos e montañeses: grupo un pouquiño máis radical. A este grupo pertencía a baixa burguesía e defendían unha democracia máis directa.

- Sans-Culottes: radicais, onde atopamos á clase popular (artesáns e campesiños). Eran partidarios dunha democracia igualitaria.

A adopción da Monarquía Constitucional foi un fracaso debido ó uso excesivo do rei do seu dereito ó veto, entre outras cousas. Debido a isto, Luís XVI decide fuxir ca súa familia en xuño de 1791, o que prexudica moito a súa figura a nivel social. A intención de Luís XVI era unirse ó exército austríaco para invadir Francia e restablecer o absolutismo.

Foi capturado en Varennes e levado a París onde ten lugar un alzamento popular que ataca o palacio. 

O rei é apresado e instáurase a República.

      2. República Democrática (1792-1794).    

- Convención  xirondina:

A Convención Nacional  xirondina levou a cabo un xuízo contra o rei Luís  XVI e a súa muller, María  Antonieta. Foron acusados de traizón e condenados a morrer na guillotina en xaneiro e agosto de 1793 respectivamente.

Fórmase unha coalición de potencias europeas contra a Francia revolucionaria (Gran Bretaña, España, Holanda, Rusia e Portugal), por medo a que se estendese a revolución ó resto de potencias.

Insurreccións contrarrevolucionarias comezan a darse no leste de Francia dan lugar a un cambio de goberno.

- Convención  xacobina (período máis radical da  revolución francesa):

Nova Constitución de 1793: con sufraxio universal directo, soberanía popular e igualdade ante a lei e impostos.

O executivo conformará un Comité de Salvación Pública, dirixido por  Robespierre, quen acabará exercendo de tirano e sementando O Terror:

- Recruta á poboación para a guerra ( leva en masa).

- Suspende as liberdades e a Constitución.

- Crea uns tribunais revolucionarios onde se xulga a calquera sospeitoso de ir en contra a Revolución (Lei de sospeitosos).

- Redacta unhas Leis sociais: control de prezos e salarios, desamortizacións eclesiásticas,

culto á deusa razón...

 A caída deste goberno dase debido a súa radicalización, goberno ditatorial e a política do medo. Todo isto fai que leven á guillotina a Robespierre. 

O exército fai-se co poder e hai un golpe de estado no mes de “ Termidor”, xullo 1794.

Guillotina.

                        

      3. República Burguesa (1794-1799).  

A burguesía conservadora ( xirondinos) volta ó poder e redactan unha nova Constitución en 1795, onde se establece:

- Soberanía nacional.

- Sufraxio  censatario indirecto.

- Igualdade legal.

- División de poderes en lexislativo (Consellos dos Cincocentos e de Anciáns), executivo (Directorio) e xudicial (Tribunais).

 Todo isto non contentaba a ninguén porque se situaron nunha posición intermedia, entre  absolutistas e radicais  xacobinos. Sumado á profunda crise e á tensión cos monarcas europeos absolutistas ten lugar un importante acontecemento.

 O golpe de estado do exército liderado por  Napoleón Bonaparte, o 18 de  Brumario (9 de novembro de 1799)

 Este golpe de estado supón o fin da Revolución Francesa e a chegada 

o poder dun militar que se fará chamar Emperador.

Liberdade guiando ó pobo francés, cadro de Delacroix.

Ata aquí o post de hoxe, proximamente continuaremos coñecendo un pouquiño máis a Napoleón ou Nabulio, tal e como o chamaban os seus achegados.

Vero💋